Documentation for a newer release is available. View Latest

Automazion de instalazion cun Kickstart

Lis instalazions di Kickstart a ufrissin un mieç par automatizâ il procès di instalazion, dal dut o in mût parziâl. I files di Kickstart a contegnin rispuestis a dutis lis domandis normâls fatis dal program di instalazion, come il fûs orari di doprâ tal sisteme, cemût partizionâ lis unitâts o cuai pachets instalâ. Furnint un file Kickstart preparât cuant che e scomence la instalazion dopo ti permetarà di eseguî in automatic la instalazion, cence vê bisugne dal intervent dal utent. Chest al è util soredut te distribuzion di Fedora suntune largje schirie di sistemis intune volte sole.

Ducj i scripts di Kickstart e i files di regjistri de lôr esecuzion a vegnin archiviâts te cartele /tmp par dâ assistence pal debug dai problemis di instalazion.

Cemût eseguî une instalazion di Kickstart

Al è pussibil eseguî lis instalazions di Kickstart doprant un DVD locâl, un disc fis locâl opûr vie NFS, FTP, HTTP o HTTPS.

Par doprâ Kickstart tu scugnis:

  1. Creâ un file di Kickstart.

  2. Create boot media or configure a network boot (PXE) server which will be used to begin the installation.

  3. Rindi disponibil il file di Kickstart sul supuart estraibil, un disc fis o une posizion di rêt.

  4. Scomence la instalazion di Kickstart inviant l’instaladôr e doprant une opzion di inviament par dî al instaladôr dulà cjatâ il file Kickstart.

Chest cjapitul al spieghe chescj passaçs tai detais.

Creazion di un file Kickstart

Il file Kickstart stes al è un file di test sempliç, che al conten peraulis clâf listadis tal Riferiment sintassi Kickstart, che a coventin tant che indicazions pe instalazion. Par creâ e modificâ i files Kickstart al è pussibil doprâ cualsisei editôrs di test che al rive a salvâ i files come tescj ASCII (come Gedit o vim su sistemis Linux o Notepad su sistemis Windows).

La metodiche racomandade pe creazion di files Kickstart e je chê di eseguî prime une instalazion manuâl suntun sisteme. Dopo vê completade la instalazion, dutis lis sieltis fatis te instalazion a vignaran salvadis suntun file clamât anaconda-ks.cfg, posizionât te cartele /root/ sul sisteme instalât. Tu puedis duncje copiâ chest file, fâ dutis lis modifichis necessaris e doprâ il file di configurazion risultant tes sucessivis instalazions.

Tal creâ un file Kickstart, ten iniments chest:

  • Lis riis che a scomencin cuntun cancelet (#) a son tratadis come coments e a vegnin ignoradis.

  • Al è necessari specificâ lis sezions par ordin. Nol è necessari che i elements dentri des sezions a sedin intun specific ordin, gjavant il câs che al sedi specificât il contrari. L’ordin just des sezions al è:

    • La sezion comant (command) che e conten i comants efetîfs di Kickstart e lis opzions come listadis tal Riferiment sintassi Kickstart. Note che cualchi comant, come install, al è obligatori, ma la plui part dai comants a son opzionâi.

    • La sezion %packages che e conten une liste di pachets e i grups di pachets di instalâ. Viôt %packages (necessaris) - Selezion pachets pai detais.

    • Lis sezions %pre e %post, che a contegnin i scripts di pre-instalazion e post-instalazion. Chestis dôs sezions no son obligatoris e a puedin sei in cualsisei ordin. Viôt %pre (opzionâl) - Script di pre-instalazion e %post (opzionâl) - Script di post-instalazion pai detais.

      Lis sezions %packages, %pre e %post a scugnin finî cuntun %end, in câs contrari il program di instalazion al refudarà il file Kickstart. La sezion di comant principâl (command) no à declarazions finâls speciâls.

  • La mancjance di un cualsisei element necessari al fasarà in mût che il program di instalazion al domandi al utent une rispueste par chel element, come che al sucedarès intune tipiche instalazion. Une volte dade la rispueste, la instalazion e continuarà. Fâs câs che se il sisteme dulà che tu vâs a instalâ nol à un visôr, no tu rivarâs a viodi la domande e al somearà che la instalazion no sedi lade a bon fin.

Verifiche dal file Kickstart

Tal creâ o personalizâ il to file kickstart, al è util verificâ se al è valit prime di cirî di doprâlu intune instalazion. Fedora al inclût la utilitât a rie di comant ksvalidator, che tu puedis doprâ par fâ cheste operazion. Chest strument al è part dal pachet pykickstart. Par instalâ chest pachet, eseguìs chest comant:

# dnf install pykickstart

Dopo vê instalât il pachet, tu puedis convalidâ un file Kickstart doprant chest comant:

$ ksvalidator /path/to/kickstart.ks

Sostituìs /path/to/kickstart.ks cul percors al file Kickstart che tu desideris verificâ.

Par vê plui informazion su chest strument, viôt la pagjine "man" ksvalidator(1).

Ten iniments che l’imprest di convalide al à i siei limits. Il file Kickstart al pues jessi une vore complicât; ksvalidator al pues verificâ che la sintassi e sedi juste e che il file nol inclût opzions gjavadis, ma nol pues garantî che la instalazion e ledi a bon fin. In plui nol cirarà di convalidâ lis sezion %pre, %post e %packages dal file Kickstart.

Rindi disponibil il file Kickstart

Une volte creât un file Kickstart, tu puedis plaçâlu intune di chestis posizions:

  • Su supuarts estraibii, come DVDs o unitâts flash USB, colegâts al sisteme di instalazion

  • Suntun disc fis colegât al sisteme di instalazion

  • Suntune condivision di rêt che tu puedis doprâ dal sisteme di instalazion

Di norme, un file Kickstart ak ven copiât su supuart estraibil o suntun disc fis, o rindût disponibil in rêt. Il plaçâ il file intune posizion di rêt al integre la solite metodiche aes instalazions Kickstart, che e devente ancje vie rêt: il sisteme al ven inviât doprant un servidôr PXE, il file Kickstart al ven discjamât di une condivision di rêt e i pachets software indicâts tal file a vegnin discjariâts dai dipuesits lontans.

Configurâ un servidôr pes instalazions al ufrìs cualchi informazion in plui su cemût preparâ une instalazion vie rêt.

Scomençâ la instalazion di Kickstart

Une volte prontât dut - tu âs creât un file valit di Kickstart e tu âs disponibil o un supuart di inviament locâl o un servidôr PXE, tu puedis scomençâ la instalazion di Kickstart. Tu âs di doprâ la opzion di inviament inst.ks= o tal menù di inviament (inviant di un supuart locâl) o zontant cheste opzion ae tô configurazion dal servidôr PXE. Par vê informazion su lis opzions di inviament dopradis tes instalazions di Kickstart, viôt Opzions di inviament sisteme di Kickstart.

Want to help? Learn how to contribute to Fedora Docs ›